4/28/2006

!قبّعت


هاي البلوزة بتنباع عن طريق موقع أبو محجوب بتزكرني بالبيانات إلي وزعها الحزب الشيوعي الأردني قبل فترة حتى يوعي المواطنين على عدم دستورية النهج الإقتصادي للحكومات المتتابعة و خاصة بمسألة رفع أسعار المحروقات إلي تعتبر سلعة إرتكازية لجميع المواطنين بغض النظر على توزيعهم "الطبقي" .. آخر البيان كان محطوط رسم كاريكاتوري لأبو محجوب (طول الله بعمره!) معنوّن ب(قبّعت)!
المهم .. إشتروا هاي البلوزة! بس والله ما أنا ربحان شي :-p

عمان نت

في صراع الإعلام على اثير الراديو أوالتلفزيون.. وقنوات الأغاني اللي عم بتصير تفئس كل شهر بالهبل ... شي بينسمع وشي اذا سمعتو بتقول لحالك : احسنلي اسمع اخبار!! يعني الحمد الله لا صوت ولا صورة
بس شي نهار وانى بلف عجل الراديو بدور على موود اف ام* طلعتلي اغنية زياد رحباني .. بعديها فيروز ... يعديها أغاني بتنسمع .. وهيك لحد ما وصلنا للأخبار... يا أخي/أختي اول مرة بسمع للأخبار بإنصات!! نشرة محلية مفصلة فيها كل شي بدور بالبلد وخصوصي الأخبار اللي يعني ما منسمعها عل الفضائيات بصراحة وعبلاطه
اذا شي نهار اجا عبالك تسمع موسيقى عنجد، منغير نشازات ولا بحات او اخبار هالبلد الكتيرة ..جرب راديو "عمان نت 92.4" وإدعيلي.. او يمكن تدعي علي... مو عارفة
http://www.ammannet.net

4/25/2006

هل حقا أن الزواج مقبرة الحب؟

كان مغرما بها إلى حد لا يوصف، وكانت تبادله المشاعر نفسها، ولشده حبهما لبعضهما الآخر سمّاهما أصدقاؤهما "روميو وجولييت".
وأمضيا مع بعضهما وقتا طويلا من الحب والغرام والمواعيد والشعر والجنون.
ولم يطيقا الابتعاد عن بعضهما فقررا الخطبة والزواج. كان حفل زفافهما بديعا شارك فيه الأصدقاء والأهل والجيران وزملاء العمل.
وبعد مرور أشهر على زواجهما أخذت العلاقة تفتر بينهما رويدا رويدا وزاد من الجفوة ولادة أول طفل لهما، إذ شعر الزوج أن زوجته/حبيبته انشغلت عنه، وشعرت الزوجة أن زوجها /حبيبها لم يعد يشتاق إليها كما كان.
واستمرت علاقتهما على هذا النحو، وزادت أعباء الحياة، ولم يعودا يريان يعضهما كثيرا إلا في أوقات الطعام، فاتسعت الفجوة، وصارا يتشاجران وويشتم بعضهما الآخر لإتفه الأسباب.
ذابت شمعة الحب، وكانا يفكران في الطلاق كل حين، لكنّ وجود الأطفال كان يحول دون ذلك.
وفي كل يوم كانت حفرة الخلافات والتناقضات تزداد اتساعا وعمقا.
فهل حقا أن الزواج مقبرة الحب؟

4/22/2006

فاتورة بأثر رجعي

عمر الفاتورة : 10 سنوات
قيمة الفاتورة : 156 دينار
العميل : مواطن اردني
الشركة :" ليما" شركة المياه

اللي صار انو بهاليومين اجا لهالمواطن تلفون من هيئة قانونية اردنية بتطالبة بدفع فاتورة ميه من شهر ايار سنة 1996 !! الغريب انو معروف انو المية بتنقطع منغير هالواسطة فكيف اذا كانت الفاتورة مو مدفوعة!! يعني ليش لحتا تصبر الشركة كل الفترة وما قطعت الميه من وقتها.. وبعدين شو بدو يثبت للمواطن انو هاي الفاتورة صحيحة ومش مدفوعة ؟!؟
بس في نقطة مهمة .. انو اللي بطالب بالفاتورة مو شركة الميه شخصيا بس محامين بتوكلهم شركة قانونية يعني صارت فاتورة الميه قضية!! حتى هاي أخدناها من بلاد برة!!
وينك يا زياد تقول: "الله يساعد الله يعين البياعين عالشرايين"

4/16/2006

التشكيلة الجديدة

من مبدأ "الرجل المناسب في المكان المناسب" شكلنا هذه الدولة
خايف الهزايمة > وزارة الدفاع
سارق المحافظة > وزارة المالية
مخالف الشرايعة > وزارة الأوقاف
سايق الحمارنة > وزارة المواصلات
هادم العمايرة > وزارة الاسكان
راسم الخرابشة > وزارة التخطيط
قاطف الزواهرة > وزارة الزراعة
ساقط عليمات > وزارة التربية والتعليم
رابط الخصاونة > رئيس الحملة الوطنية لتنظيم الأسرة

نتمنى لها التوفيق :-)


4/14/2006

العين بصيرة والايد قصيرة .. ولكن

والان .. وبعد أن أصبح قرار رفع أسعار المحروقات واقعا مطبقا على أرض الواقع .. ولم تبدي "المواطنة" المحلية أي "مقاومة" ولو كان اعتصاما شعبيا فعليا .. اصبحنا امام خياران: إما أن نقبله أو"نتقبله" كما هو فنبكي لألمنا ونشتكي لأنفسنا، أو أن نوجد مصادر وحلول أخرى لتوفير هذه الطاقة الواجب استعمالها والتي لا يمكن الاستغناء عنها بعد أن وصلنا إلى ما نحن عليه الآن
تقوم أمانة عمان وغيرها من الأمانات في مختلف المحافظات بسن الكثير من التشريعات والقوانين في مجال البناء والإنشاء.. فلما لا تسن على الشركات الإنشائية قانون وجوب تركيب السخانات الشمسية للمباني وخصوصا الاسكانية منها. فشمس الصيف الحارقة ودفئ الربيع كفيل بنسخين كميات هائلة من الماء لاستخدامها في امور الحياة اليومية، وبذلك نستطيع أن تعتبر اننا وفرنا الكثير من الديزل "السولار" لغايات التسخين بدلا من حرقه .. وبذلك نكون قد وفرنا الكثير من الدنانير والطاقة
ربما تكون لجمعية حماية الطبيعة دور فاعل وايجابي في تشريع مثل هذه القوانين
ان الزمتنا الدولة بقانون رفع اسعار المحروقات فلما لا تلزم القوانين التي من شأنها تخيف الضرر والكلفة على المواطن المسكين؟


4/11/2006

?ما الذي يجعلنا

وما الذي يجعلنا نقول ان تاريخ الثورة الاشتراكية، ثورة اكتوبر امتد سبعين عاما؟ ذلك يرجع الى عدم فهمنا للاشتراكية الحقيقية، الاشتراكية الخالية من الاستغلال ومن الازمات الاقتصادية ومن البطالة ومن الدعارة ومن التضخم النقدي ومن الغلاء المتصاعد للمواد الاستهلاكية ومن السوق السوداء ومن الحاجة الى القروض الاجنبية والمشاريع الامبريالية. مجتمع لا يحتاج بعد سبعين عاما من الاشتراكية الى ماكدونالد ليجهز المجتمع السوفييتي بالهامبورغر بمواد يأخذها من داخل البلاد او بيتزا هات لتعد للمجتمع البيتزا بالطحين المحلي والجبنة المحلية.

4/10/2006

ثورة المخلوقات الحية على الانسان

اجينا ندلل حالنا فأكلنا سمك .. قالولنا تأكدوا من المصدر، المية ملوثة بالنفط والنفايات النووية.. قلنا طيب بلاش.. ليش الفشخرة والبعزئه .. شو مالها اللحمة.. طعمها طيب وبتتاكل ب100 طريقة .. بس وين؟؟ احذروا جنون البقر .. لأ ومش بس اللحمة، والحليب ومشتقاته كمان.. قلنا يلا الجاج أرخص وأنظف والبيض ولا أزكى.. بس وين، شو مفكر حالك عايش بالجنة!! هلأ بترشح وبتخنأ!! بعدين بهالقصة.. شو نعمل بحالنا؟! خلص خلينا نعيش سواسية وناكل الخضار والفواكة ونخلي اللحوم بالمناسبات هيك بقولي أكثر صحة.. وللرجيم ممتاز .. ما تفرحوش كتير يا ناس.. اكتشفوا انوا خضار هالأيام بسبب سرطانات وأمراض لأنوا كلوه هرمونات
اي ينعل اخت هالشغلة! ولكم يا * شو عملتوا بهالعالم! لا اكلنا تهنينا فيه، ولا لبسنا تسترنا فيه -لأنه حسب مقاييس الاناقة لازم نختصر نصه.. وبتعرفوا القماش غالي هالأيام- . ولا رواتبنا نبسطنا فيها لأنوه عم ندفعها ضرايب وبنزين
عارفين ليه؟؟ لأنه في "مخلوقات" على الأرض هدفها بالوجود كسب فلوس بأسرع طريقة وأكبر قدر شو ما كانت الطريقة .. فهجنوا النباتات ونفخوا الجاج هرمونات وفجروا سفن النفط فدى حروبهم المقدسة

اذا هاي هيه "أمنا الأرض" شو هي جهنم؟!؟
مو عارفة!
لسة.. الجاي أعظم... تأهبوا ;-)

رفع الأسعار.. وهذه القصيدة

لن أعيد وأكرر مآسيينا وهمومنا من جراء ارتفاع الأسعار.. ولكن تزامن هذا وقراءة هذه القصيدة بعنوان "مكسب شعبي" لأحمد مطر .. ان شاء الله تعجبكم
***
آبارنا الشهيدة تنزف نارا ودما للأمم البعيدة
ونحن في جوارها نطعم جوع نارها لكننا نجوع
وتحمل البرد على جلودها ونحمل الضلوع
ونستضيئ في الدجى بالبدر والشموع
كي نقرأ القرآن والجريدة الوحيدة
.....
حملت شكوى الشعب في قصيدتي لحارس العقيدة وصاحب الجلالة الأكيدة
قلت له:
شعبك يا سيدي صارعلى الحديدة
شعبك يا سيدي تهرأت من تحته الحديدة
شعبك يا سيدي قد أكل الحديدة
وقبل أن أفرغ من تلاوة القصيدة رأيته يغرق في أحزانه ويذرف الدموع
وبعد يوم.. صدر القرار في الجريدة:
أن تصرف الحكومة الرشيدة لكل رب أسرة ............. حديدة جديدة
والسلام

4/08/2006

رداً على رفع أسعار المحروقات

دعت لجنة أحزاب المعارضة الأردنية في بيان تمّ توزيعه إلى تعليق الدوام غداً من 12:30 الى 1:00 إحتجاجاً على رفع أسعار المحروقات.
رغم ضعف هذا الموقف .. بس أحسن من بلاش

4/04/2006

فول .. و أمريكي

الجمعة الصبح .. و كالعادة إطلعت من البيت و شعري منكوّش .. باتجاه دكانة حارتنا. أحلى شي يبدا الواحد يومو بصحن فول منزلي-التحضير! المهم .. وصلت دكانة يشتغل فيها "شويـخـين جليلين" و بهالدكانة مليون ستيكر و ستيكر لمقاطعة المنتجات الدينماركية .. دخلت، و فوتت وين هالفولات قاعدات. بالعادة بشتري الفول الصيني .. إبصر شو إسمو .. كأنو "يان" أو شي زي هيك.
بطلّع على علبة الفول .. ايه! شكلو غريب! مش"كاثوليكي" يعني .. ما عمري جرّبت هالنوع .. و الله خطّر في بالي أشوف البلد المصنّع .. أمريكي! شو هاد! فول .. و أمريكي!
رحت رجّعت هالعلبة و اتجهت لأبو لحية القاعد عند الكاش .. الله و دين و مقاطعة الدنمارك .. و بتبيع فول أمريكي! يا ناس .. مش الأولى اتقاطعوا عدو الإنسانية كلها بدل اتقاطعوا هونولولو و جزر القمر الوسطى! يخرب بيتكو

4/02/2006

البلد في حالة طوارئ!

تعرضت البلاد -في الثاني من شباط الواقع يوم الأحد- إلى طوفان مطري رباني الأمر الذي أدى الى إحداث العديد من الحوادث المرورية وغرق سيارات في أنفاق الشوارع. والناظر في هذا الأخير يستذكر فورا شوارعنا المعبدة على طريقة الميلان المضاد "المعاكس"! إن كل سائق، مواطن كان أم مسافر يتذمر من كثرة المطبات والحفر .... والمناهل في الشوارع. حاول أن تعد المناهل والمصارف في طريق طوله 3كم و عرضه 12م مثلا... ماذا وجدت؟؟! المثير للدهشة هو ما نعانيه عند هطول المطر إذ نصبح تلك المناهل بقعة لتجميع المياه فوقها وليس العكس
ولكن الطرفة في هذا الطوفان بالذات أن البلد "نقلبت اعدت" في كل مكان. فقد اصبح احد الأنفاق مغلق بالكامل وكأن المياه تخرج من جوفه، وقامت احد المستشفيات باستدعاء الأمن والنجدة لأن المياه قد غطت عمقا من الطابق الأرضي فاستدعا ذلك مضخات لسحبها. وفي احد المدارس انفجر احد الأنابيب بسبب الضغط الناجم من انغلاق شبكة التصريف.. وتخيلوا باقي القصة

بس بضل الأمل النا احنا المواطنين انه هاي الماي تتجمع صح لحتا ما ننقطع بالصيف من الماي زي ما بصير كل سنة، بدل ما تروح الماي عالمجاري

مع تمنياتي بموسم زراعي وفير

4/01/2006