9/29/2006

إلتزم الصمت كي تتفادى الضرب

عندما كنت طفلة، و كنت أعود من الكتّاب منتفخة القدمين بفعل الفلقة، كانت جدتي الي حاولت دائماً أن تعلمني السعادة، تسألني: ولكن يا صغيرتي، ماذا فعلت بالضبط. كنت أحبس دموع الإهانة و الغيظ، و أشرع في صياغة الجواب: كنت أود أن أقول للفقيه .. ، كانت جدتي التي تحمل وراءها خمسين سنة من الحريم، تقاطعني دائماً قبل أن أكمل جملتي الأولى: أيتها الصغيرة، لا تذهبي أبعد من ذلك، لقد اقترفت خطأ فادحاً، كنت أنت تودين قول شيء للفقيه، في سنك لا نقول شيئاً، و خاصة لمن هم أكبر منا سناً. إننا نسكت و لا نقول شيئاً، و سترين، لن تضربي قط. توفيت جدتي عندما كنت في الثالثة عشرة، خلال ظهيرة صيفية جميلة، كبرت، و غادرت الكتّاب.
و سرت في الحياة بخطى واثقة بحثاً عن الكرامة، ولكن مسيرتي تخللتها دائماً النصائح المقلقة ?ولئك الذين يحبونني، و الذين يريدون سعادتي، كانوا كلهم يرددون نفس الشيء: عليك أن تصمتي لكي تتفادى الضرب.

سلطانات منسيات - فاطمة المرنيسي - 284

قد أتفّهم موقف هؤلاء الذين يحبوننا و ينصحوننا، و لكني أطلب منهم أيضاً أن يتفهموننا .. فالضرب أيضاً قد يكون بداية التغيير .. نحو الأفضل

9/28/2006

المستور يتضامن مع لبنان على طريقته

كما هو معلوم، تضامنت العديد من مؤسسات المجتمع المدني الأردنية مع لبنان، كل على طريقته. رابطة الكتّاب الأردنيين، مركز عمّان لحقوق الإنسان، شبيبة الحزب الشيوعي الأردني، شبيبة الشغيلة الشيوعي .. و قيادة الحزب الشيوعي الأردني الذين كان لهم فعالية قبل أيام في لبنان، و التقوا قيادات من حزب الله و الشيوعي اللبناني.
في العدد الأخير من مجلة "المستور" المتخصصة بقضايا الفقر في الأردن، هناك مجموعة من المقالات المتعلقة بالوضع اللبناني، حيث ذهب "المستور" إلى الجنوب اللبناني و الضاحية الجنوبية ..
مقاومة الفقراء و نصرهم
حياة الناس في "عيتا الشعب" : دورة صمود متكاملة
خراب موسم الدخان
الصور و الإعلانات في لبنان ..حرب أخرى
هذه بعض العناوين الموجودة ..
بنصحكم فيها

9/23/2006

من عمّان إلى إربد .. مشي 2


الخروج من عمّان
عمّان .. هاي المدينة إلي سنة بعد سنة عمبتظهر فيها ملامح أقوى للطبقية: غربية و شرقية. هذا ضمن المجال الداخلي، أمّا المجال الخارجي، فبتذكر إنو أنا و صغير، و بالتحديد لمّا كنت ساكن على طرف جرش، كان إلي نظرة سلبية اتجاه هادول الناس إلي بيكونو من عمّان .. ما كنت أعرف ليش .. بس هيك


مشهد على مخيم البقعة من شارع الأردن
المخيم، رغم إنو دورو و شكلو اتغير على مر هالسنوات .. بس بيضل يحمل نفس الفكرة : حنظلة


حادث سير بآخر شارع الأردن


خلال المسير اتجاه جرش
في كتيير ناس ممكن يتفقو على عمل ما .. بس منطلق هاد العمل يكون مختلف .. بقدر أحكي انو هاد الي صار معنا. مهند كان حاب يشعر بجزء صغير من تجربة أهلو خلال النكسة .. ممكن هو جرّب التعب الجسدي، بس ما راح يفهم التعب النفسي إلا إلي انتكس


واحدة من دوريات الشرطة إلي صادفناها
أضحك ملامح ممكن اتشوفها، لواحد مصدوم من إلي بسمعو :) جايين مشي من عمّان؟! ما واجهنا أيّ مشاكل مع الشرطة ، عكس إلي اتوقعناه


هاع ! الوصول إلى جرش
أحلى شعور .. أول نقطة إستراحة! أكلنا مناقيش من محل لاقيناه فاتح .. و أهم شي : هوينا رجلينا :) استرحنا تقريباً ساعة هناك و بعدين كمّلنا المسير إلى إربد


هممم .. نفس إلي كنت أحكيه و أنا في المدرسة! الصورة في جرش


قيلولة نص ساعة .. في الطريق إلى كابول .. قصدي إربد


إستلقاء في إربد .. بعد حوالي 17 ساعة مشي
أكيد لا .. ما روّحت على عمّان مشي! توبة

9/22/2006

من عمّان إلى إربد .. مشي

شو؟ جاي من عمّان مشي ؟!
آه يا ابن الحلال!
طول الطريق امبارح، و كل ما انشوف ناس أو دورية شرطة .. نفس ردة الفعل .. يسمونا هبل ويلا مجانين ويلا "مغامرين"، مش فارقة معي
المهم، أنا و رفيقي مهند قطعنا هال90 كيلومتر بحوالي 17 ساعة!
المشي مش غايتي .. وسيلة للتفكير .. كل هالأشياء إلي في بالي، هالأحاسيس إلي عمبتتحرك جواتي، بدها "هدوء نسبي" و حالة من صوفية "التعذيب الذاتي" للتركيز. كل إلي بتحتاجو، واحد مجنون متلك يطلع معك ..
إطلعنا من إشارة الدوريات في عمان حوالي الساعة 6 .. و ابتدا المشوار. أول شي واجهناه في الطريق، و بالتحديد في آخر شارع الأردن، حادث موقف السير تقريباً، باص من باصات عمان-اربد مقلوب بنص الطريق! خير اللهم اجعلو خير .. حسب رواية الراعي إلي مشى معنا شوي بالطريق، انو الباص مسرع و ما سيطر عليه السوّاق، و للأسف، حالة وافاة واحدة مؤكدة :(
من أبيخ الأشيا إلي ممكن اتصير معك، هي انك اتكون تعبان، و يلحقك 4 كلاب! و هادا إلي صار معنا .. لولا انو الراعي صفّر لكلابو .. كان أكلنا هوا ..
كتير منّا اتعوّد انو دايماً يخطط أموروه ، يحاول قدر الإمكان اتكون خطواتو مدروسة .. بس مش دايماً بتنفع. في أشيا منيح انها تيجيك وانت لا مخطط إلها و لا بطيخ .. هيك .. فجأة .. و مش بس انت الي بتكون مفاجئيتك .. ممكن الطرف التاني كمان
مشوار عمّان-إربد .. خطوة بتكسر الروتين تبعك .. و بتحسسك انو ممكن أحياناً اتصيير أشيا ما إلها معنى هلّا .. بس لاحقاً بتنفهم أكتر .. كل الي بدوياه هو شوية وقت
هلا بطلعلي واحد و بيسألني ليش روحت على إربد يعني؟! .. بكل بساطة، بقولو المرة الجاي بدي أطلع على مادبا ! مش عارف ليش .. ممكن لأنو المسافة أقصر :)

يتبع لاحقاً

9/19/2006

طه والمسيح

مرة أخرى يعاد فتح أبواب الخلافات بين الشعوب على أسس دينية.. فلو فرضنا أن المسلمين اتخذوا فهما مغلوطا لتصريح البابا، أو أن تصريحه كان به إسائه لمشاعر المسلمين وتجريح بالدين الاسلامي، أي كان أكثر صحة فأنا ومن وجه نظري الشخصية أرى أن كلا الإحتمالين وارد ولكن ليس هذا هو المهم، فأنا أرى وكما مر سابقا علينا من أقوال حكماء وعظماء تخدم أقوالهم و أفعالهم مصالح أمريكية وإن صح التعبير مصالح تصب لخدمة العولمة لتبث الفرقة بين الشعوب فتأخذ الحميّة بالأخيرة وتعكف الشعوب للإقتتال لمعتقداتها تاركة المجال في ذات الوقت لتلك الشرائح المدسوسة والحيتان على مستوى العالم ليقوموا بمعادلاتهم وحساباتهم ومشاريعهم بأريحية بعيدا عن تسليط الضوء عليهم أذ أن الاَضواء الآن محجوزة للعقائد!! يعني باختصار هذه الفتنة ليست سوى لعبة اخرى لشغل الشعوب ببعضها البعض وإقصائها عما يدور في فاعات الفنادق والقصور والشركات التي تستخدم الدين والعقائد ايضا كسلعة مطروحه للتسويق، تدرس كيفية تسويقة ورفع وخفض سعره بذات المنهجية التي يرفع ويخفض فيها سعر سانديش الفلافل! هذا ولا شك في استخدامه لتنحية الشعوب عن مجريات الحياة السياسة على الصعيد العالمي وترك القادة لتصفياتهم ورسم معالم خرائط عالمهم المرتجى

والدين في الناس حقل ليس يزرعه غير الألى لهم في زرعه وطر
مـن آمـل بـنعـيم الخـلـد مـبـتـشـر ومن جهول ييخاف النار تستعر
فالقوم لولا عقاب البعث ما عبدوا ربّا ولولا الثواب المرتجى كفروا
إنما الدين ضرب من متاجرهم إن واظبوا ربحوا أو أهملوا خسروا
ليس في الغابات دين لا ولا الكفر الفبيح
فــإذا الـبـلـبـل غنــى لم يقل هذا الصحيح
إن دين الناس يأتي مثل ظل ويروح
لم يقم في الأرض دين بعد طه والمسيح
أعطني الناي وغني فالغنا خير الصلاة
وأنين الناي يبقى بعد أن تفنى الحياة

جبرا خليل جبرا- المواكب

by: mowatina

9/12/2006

نصر الله في مقابلة على الجزيرة - معاتبة بين الأحباء والحلفاء

يعني بس كرامة لشهداء مناضلي الحزب الشيوعي اللبناني
لمكسيم
و لعلي وحسن النجدي
لمقاتلي الحزب اللي بصريفة وعيترون وجبيل
وللمقاتلين اللي قضوا الحرب أخوة مع مقاتلي حزب الله وحركة أمل
لحي موسكو اللي راح كلو بالقصف الاسرائيلي ،
لفاطمة اللي راح ناس غالية عليها وهي بتحارب اسرائيل
لأدهم خريج العلوم السياسية اللي ما ترك ضيعتوا وضل يسعف ويناضل وقت الحرب ويساعد المقاتلين
لتاريخ الجيش الشعبي
لذكرى قوات الأنصار
لروح لولا عبود
لكرامة أسر أنور ياسين
لإنتماء سمير القنطار
لأي شي من هدول
، يا ريت لو حكى نصر الله أنه من حلفائه كان الحزب الشيوعي اللبناني
مش الحزب الشيوع... وهو مستحي



المقاومة برضوا كانت حمرا


حي موسكو بالأرض
غير هل الملاحظة اللي كان بدها فشة قلب، أثبت حسن نصر الله انه سياسي من الطراز الرفيع علماني الطرح و يمكن يساري التفكير :)

A Matter of Life and Death


Iron Maiden .. واحدة من أشهر فرق ال Heavy Metal، صدر ألبومها ال14 قبل حوالي كام يوم. هاي الفرقة المشهورة بأغانيها حول الحرب، زادت رصيد أغانيها حول هذا الموضوع بألبومها الجديد.

The longest day بتاخدك لأيام الحرب العالمية الثانية، و بالتحديد معركة النورماندي .. مثل معظم أعمالهم السابقة، إلي كانت اتخليك تشعر و انت عمبتتاخد على المشنقة، أو بتشعر انك جندي عمبتموت، كل هاد، بخليك اتفكر اكتر ,, ليش هالحرب عمبتصير.

هالا لازمني كام يوم تأمل بهال ألبوم ..

No chat !

A Soviet war poster "Don't chat! Chatting leads to treason" (1941)

9/09/2006

موسيقى الشارع .. من موسيقيين لاطبقيين

ظهرت في الفترة الأخيرة بشوارع عمّان مجموعة من الموسيقيين الشباب، يفترشون بآلاتهم الموسيقية على الأرصفة هنا أو هناك، و ينقلون فنّهم للمارة، فتلتف حولهم مجموعة من الأصدقاء و مشاة الرصيف و الفضوليين ليرددوا معهم كلمات الأغاني. "نسّم علينا الهوا" "شو هالأيام" " البحر بيضحك ليه" .. جزء بسيط من الأغاني التي يرددونها دون كلل ..
موسيقاهم قد لا تحوي هذه الأجهزة المعقدة، فلا سماعات و لا "مايكات"، فقط صوت قرع الطبل و دق الوتر و حناجرهم. موسيقى من القلب إلى القلب .. دون طبقية و دون دفع.

و أكيد بلا ضريبة

الصورة في جبل لويبدة

9/08/2006

!حتى هاي يا الله

يا بشر والله عيب! استحوا على دمكوا وبكفي.. ما بكفي اشّطولنا البحر والشط ورشمتوهم اوتيلات وحرمتوا المواطن انو يشوف المي الاّ بالدولار!! وصارت فتحة العداد لطلبية فنجان قهوة عكرسي بلاستك وطاولة بتلؤ 75 قرش!! وهلأ اجت الاوتيلات الامريكية والاسرائيلية وبسطت حوالي الكعبة عشان تصير الليله بالغرفة بمئات الدنانير عشان انو يعني تشوف الكعبة وانت بتحلم ولاّ بلحظة تأمل! يا غجر ويا بجم: لما الله قال اعتمروا وحجوا، ولما اتفقوا ما بعرف مين انو اللباس يكون شرشف ابيض لغني او لفقير كان الهدف واضح زي عينك، الناس بهالمكان وهالوقت تكون سواسية ولا في غني ولا فقير. مش عشان تروح الشركات الرأسمالية وبالموافقة السعودية الإسلامية على بناء غرف للناس يدفعوا بالليله اسعار خيالية، ولكم شو بتعرفو عن الله اذا وانت بتصلولو بدوروا على ارقى مستويات الراحة!! يعني شوي وبتنقوله الكعبة عند البحر عشان بالمرة "أكل وسهرة وعمرة ويعني من مجاميعوه اسم انو صار الواحد مسافر
والله هادا اللي بتعملوا عين الكفر، تجردوا من ماديتكم وطبقيتكم لأيام بس من حياتكم اذا كنتم عنجد بتآمنوا بالله ورؤيته انو لا فرق عن غني او فقير الاّ بالتقوى.. والسلام