المكان: الجامعة الارنية/ مقابل مجمع وصفي التل "سكوير" العلوم
الزمان: بين الساعة 1-2 تاريخ 9/4/2003
مسبب الحدث: صبية مرتبة حالها على موضة غريبة عن الموضة العامة
الأعضاء والجمهور: الطلاب
القصة
مجموعة من الطلاب والطالبات يتناقشون بحدية احتلال العراق، إلى أين وصل، طبعاً النقاش منقسم بين مؤيدي الاحتلال الأمريكي كالحل الوحيد للتخلص من صدام ( لازم نقبل إحنا بلد ضعيف ما عنا موارد ولامصادر لازم نمشي مع الأقوى مشان مصلحة بلدنا حتى لو بالغلط) وبين أصحاب الرأي الأخر من رافضي الاحتلال والحرب بأسباب وهمية ( صدام، اسلحة دمار شامل، حرية) واستغلالها وقتل الابرياء والمدنيين ، حججهم عقلية وعاطفية تتفق على رفض الحرب بالرغم من كرهم لصدام.
بنص الحوار التلفونات بترن بتخبر أنه بغداد سقطت، والكل بيحكي للكل وحزن وتعصيب بس بهدوء وموضوعية طبعاً لأنه الاحتجاج والرد وحنى التفكير ما بيجيب نتيجة ولازم نشجب ونستكر ونفكر لو ألف سنة بحل جذري ولو كان مستحيل
فجأة بنسمع صوت وعجقة وناس هاجمة (يا ريت مظاهرة لأنه الموضوع مهم ولازم يصير تحرك) بس هالحكي مش صحيح القصة ومافيها أنه صبية ملفتة للنظر كانت بتمشي بالجامعة وكل ما تمر من مكان بيلحقها شباب زيادة لصار وراها مظاهرة، طبعاً البنت بتركض لباب كراج العلوم ركض وبتمر من "سكوير" العلوم ومن عند تجمع الطلاب الكبير لما تكون الساعة 1.
الطلاب الموضوعيين واللي بيناقشوا احتلال العراق ببراغماتية وهدوء وعقلانية ، انهبلوا وطار عقلهم لما شافو البنت وبلش التزقيف والتصفير والتعليق اعجاباً وذماً من البنات قبل الشباب وفجأة تحولوا الطلاب من عقلانين وموضوعيين وبناقشوا الحرب بنسبية إلى شباب ذو رأي وموقف، وقرارات ومواقف حادة ضد من يتجرأ ويقول حرة تلبس شو ما بدها شو إلكم فيها . أكيد ما في إشي اسمو حرية شخصية لما يكون الوضع بهالشكل والطلاب شباب واعية إلهاإهتمامت ودور أساسي في التوعية وأخذ المواقف وإذا موقف زي هيك أخلاقي وديني ما أخذوا فيه موقف، شو ضل يعيشوا مشانوا
أكيد مع الموبايلات بالكاميرات ما ضل حدا ما لحق الطالبة ليصورها ولتصير عجقة الأيام القادمة في الجامعة الأردنية عن 9/4/2003 يوم سقوط بغداد هو اليوم الأهم للتخليد في الذاكرة ونشره على الانترنت وبالإيميل ليس بسبب سقوط بغداد بل لأنه يوم مرور بنت لابسه غير وأقل احتشاماً بطريق الجامعة
يوم غير عادي بالتاريخ الحديث ، عكس سخرية سوء الأوضاع والوعي الانساني (مش حتى السياسي)المتردي بين طلاب الجامعات، ما بنعرف كيف حتكون الأوضاع كمان أربع سنين في 9/4 بالجامعة ، عايشين تنشوف
