أرجو من الحكومة النزيه خصخصة الأوكسجين

يعني الحمد الله ما خلينا شي بهالبلد يعتب علينا .. لا مي ولا كهربا ولا بريد ولا ولا ولا .. وآخرهم كان التلفون. فقد قامت الحكومة النزيه ببيع أكتر من تلتين شركة الاتصالات، ولمين .. لشركه اوروبية يا ريت لأردني أو متجنس! ا بس قولنا يلا يمكن هيك احسن بتتحسن الخدمات لأنو بتعرفوا اديش همه الغرب متطورين وحريصيين من كل قلبهم على تنمية دول العالم النامي. وانبهرنا حقيقي بالتغيرات - من يوم ما استلمو الحكم - اللي ركزت على تطوير نظام جباية الاموال بأي طريقة!! اول شي زادت نسبة الضريبة عالفاتورة.. ويا حرام عشان المساكين احتاروا شو يسموها لأنو استنزفوا كل الاحتمالات، سموها "ضريبة إضافية" . ولكو يخرب بيتكو، والله انقطع الحيه!! الفاتورة مش الكو وكمان ما سلمت من شركم، كيف ومين وبأي حق -غير ضريبة المبيعات- بتحطوا كمان ضرايب؟!! المهم ايها المواطن/ة العزيز/ة نظرا لشح الحكومة من المسميات قررنا طرح مسابقة :"سمِي الضريبة، واربح" واتصل على الرقم المجاني 123321
سيبونا من الضرايب وهمها وخلينا بفرحتنا الأكبر.. الدليل1212 اللي كان مجاني لخدمة المواطن صار بفلوس ويا رقم مبارح ببلاش اليوم بمصاري
اليكم البيان الآتي .. "عزيزتي المواطنة، عزيزي المواطن تحية وبعد .. حرصا على غايات ضبط الجودة ققرنا أن نجعل نظام -ردادة التفونات- لمدة 5 دقائق من التعليمات والشروحات قبل وصولك الى الموظف، والذي سوف يتلقى طلبك برحابة صدر وابتسامة مشرقة معرفا بنفسه. ولكي نضمن لك لباقة الرد حرصنا على تسجيل مكالمتك بالكامل لغايات ضبط الجودة بالطبع. لذا ومن منطلق خدمة المواطن ققررنا فرض رسوم رمزية لهذة المكالمة والتي تبلغ 3.5 قرش لكل مكالمة تضاف على الفاتورة. ولأننا لا نؤمن بالتفرقة الطبقية والمواطنيين عنا سواء فسيكون هذا الرسم نفسه لكل الأرقام مهما بلغت أهمية أو عدم أهمية المسؤؤل عنه.. ولكم منا أخلص الأماني" .. طيب ماهية نص الأرقام اللي بيعطونا ايها غلط، هل يا ترى بطلعلنا نطالب بال 3.5 اللي راحوا برفعة خط!؟
الله يديم الحكومة ويقويها كمان وكمان ونرجو منها التكرم باعلان طرح عطاء خصخصة الهوا هيك يمكن يضيفوا خدمة "هواء خالي من عوادم السيارات معطر برائحة النفط"!! ومندفع كمان ضريبة شو ورانا، ولاَ شو؟!؟